ORANJESTAD, 5 di october 2025 – Ministerio di Innovacion a tene un reunion importante na oficina di DIMAS cu meta pa traha un base cla pa implementacion di E-Government. Na e reunion tabata presente: sra. Ruiz-Paskel directora di DIMAS, sra. Luidens directora di CENSO, sra. Dijkhoff-Pita di DEZHI y tambe sr. Bill Kuipers.

Hunto cu miembronan di Stuurgroep Digitalisacion, Informatisacion y Automatisacion (SDIA) di parti di Ministerio di Innovacion, sr. Kuipers a elabora riba e rapport di ICTU di cual e ta e persona encarga. Un rapport, cu ta describi varios di e desafionan cu por tin den e proceso di implementacion pa cu E-Government, entre otro:

• Fragmentacion den infrastructura y sistema,
• Diferencia grandi den madurez digital entre departamento,
• Falta di flex-capaciteit pa proyectonan grandi,
• Necesidad urgente pa kaders, richtlijnen y standardisacion.

Considerando e preparacionan profundo cu ta andando pa cu implementacion di E-Government, a mira e importancia pa dialoga riba e rapport aki y su consehonan, mirando cu ta trata eficiencia, capacidad interno y un maneho integral ora ta trata ICT infrastructura y desaroyo.

Na e reunion, e departamento y expertonan a pone enfasis riba:

• Standardisacion y protocol pa compra y desaroyo di software/hardware pa evita fragmentacion.
• Test di siguridad anual/bianual pa yega na un nivel di “digital resilience” mas halto.
• Creacion di un CIO y un CISO nacional, manera ICTU a recomenda, pa lidera innovacion y seguridad na nivel di pais.
• Flexpool di experto pa asisti departamentonan cu experticio specialisa (data governance, cybersecurity, API development etc.).
• Capacity building: formacion continuo pa empleadonan, mirando rol nobo den interoperabilidad y siguridad digital.
  
  E departamentonan presente a mustra gran interes y compromiso. Ta mas cu claro cu siguridad digital ta fundamental, mesun manera infrastructura fisico, pa proteha dato di ciudadano. Tambe a sali na cla cu cooperacion cu partnernan externo lo yuda Aruba sigui mehora practicanan mundial.
  
  Ministerio di Innovacion ta gradici tur departamento pa su participacion y ta pone enfasis cu E-Government ta un paso esencial pa un Gobierno mas transparante, eficiente y sigur – un cambio cu lo trece beneficio directo pa pueblo di Aruba.