ORANJESTAD, 8 di April 2026 – Gobierno di Aruba, representa pa e Minister di Educacion, sra. mr. Gerlien Croes, a firma un convenio di colaboracion cu Expertisecenter Onderwijs en Zorg (EOZ) di Boneiro. E convenio aki ta forma parti di un strategia nacional pa fortalece sistema di cuidonan pa muchanan y hoben na Aruba.

E colaboracion ta enfoca riba mehoracion di calidad di diagnostico, intercambio di conocemento profesional y reduccion di tempo di espera pa muchanan cu tin necesidad di sosten educativo y psicologico.

Meta principal di e colaboracion aki ta pa brinda sosten mas rapido na muchanan cu tin necesidad di yudansa na e momento cu e mas mester dje.

Durante e ultimo aña, Ministerio a inverti structuralmente den fortalece e forma fundamental di e sistema di cuido di nos muchanan riba diferente nivel:

• Expansion di ekipo di MDC cu un psicologo y logopedista
• Refuerso di inspeccion di enseñansa cu un inspector extra
• Mas capacidad den Departamento di Enseñansa Aruba
• Mas trahado social escolar (SMW’er) pa sostene muchanan directamente na scol
• Reduccion di cantidad di alumnonan pa klas (maximo 24) pa logra mas atencion individual

E convenio cu EOZ ta agrega un dimension entre Aruba y nos hermana isla Boneiro, unda ta comparti conocemento y experiencia pa sigui profesionalisa e sistema di Aruba.

Segun e convenio, e colaboracion lo enfoca riba:

• Baha y maneha tempo di espera
• Fortalece uso di Papiamento den diagnostico
• Desaroyo di metodonan pa dyscalculia
• Fortalece rol di psicologo di salubridad mental den sistema educativo

Segun Minister Gerlien Croes; “Nos ta traha sistematicamente pa crea un sistema unda ningun mucha no tin cu warda demasiado pa yudansa. E colaboracion aki ta un paso concreto den nos strategia pa pone e bienestar di nos muchanan na prome luga.”

E convenio tin un duracion inicial di dos aña y lo wordo evalua pa determina e siguiente fase di colaboracion.