ORANJESTAD, 20 di mei 2026 – Awe den un ceremonia oficial den Nieuwe Kerk na Den Haag, Gobierno di Aruba a instala señora Mildred Schwengle oficialmente como Minister Plenipotenciario di Aruba na Hulanda.

Como Minister di Relacionnan den reino, Educacion, Hubentud, Innovacion y Deporte, sra. mr. Gerlien Croes a expresa cu tabata un gran honor pa atende e ceremonia aki hunto cu su coleganan, Prome Minister mr. Mike Eman y Minister mr. Geoffrey Wever.

“E instalacion di Minister Mildred Schwengle ta representa un paso importante den fortalecemento di e relacionnan entre Aruba y Hulanda, y den e manera cu nos pais ta wordo representa riba nivel internacional”, segun Minister Gerlien Croes.

Durante su discurso, Minister Gerlien Croes a enfatisa e importancia di representacion digno y compromiso continuo cu Aruba su desaroyo. E a destaca cu liderazgo fuerte y cooperacion ta clave pa sigui construi riba e fundacion di nos pais y pa avansa den un mundo cada bes mas interconecta.

E ceremonia a tuma luga den un atmosfera di dignidad y significacion special, caminda durante e ocasion tambe a wordo conmemora dos logro historico importante pa Aruba: 40 aña di Status Aparte y 50 aña di Himno y Bandera.

“E momentonan aki ta recorda nos di nos identidad, nos historia y nos responsabilidad comparti pa sigui traha pa un futuro fuerte y sostenibel pa Aruba”, Minister Gerlien Croes a añadi.

Gobierno di Aruba ta desea señora Mildred Schwengle hopi exito den su funcion como Minister Plenipotenciario y ta confia cu su liderazgo y dedicacion, Aruba lo sigui fortalece su posicion den Reino Hulandes.