ORANJESTAD, 12 december 2025 – Riba diaranson, Minister di Educacion, mr. Gerlien Croes, a sigui cu su serie di bishitannan na scolnan di Aruba, cu e meta pa papia cu educadornan, mira e facilidadnan di scol y tene contacto directo cu alumnonan pero tambe cu personal di cada scol. E bishitannan ta forma parti di un ronda pa fortalece e relacion entre gobierno y sector educativo, y pa tene un bista real di loke ta pasa den e veld tur dia.

Minister Gerlien Croes recientemente a bishita Colegio Conrado Coronel y SPO Sta. Cruz, caminda tanto educadornan como alumnonan a ricibi e Minister cu energia positivo y alegria. Tur dos scol a mustra un ambiente di dedicacion, entusiasmo y compromiso pa forma e futuro di nos hubentud.

Minister Gerlien Croes a tuma nota cu gran aprecio e entrega di tur educador y personal di scol cu dia tras dia ta traha pa brinda nos muchanan un ambiente di siñamento sano, inclusivo y di estimulo.

A sigura cu Ministerio di Educacion lo sigui traha man den man cu scolnan pa contesta nan necesidadnan y pa sigui fortalece calidad di enseñansa na tur nivel, pero tambe percura pa sigui sostene y aprecia nan trabou diariamente.