Minister Gerlien Croes a atende dialogo cu Nederlands Jeugdinstituut (NJi) encuanto maneho di hubentud

Oranjestad, 24 di juni 2025 – Finalisando su bishita oficial na Hulanda, Minister di Hubentud, Gerlien Croes, a realisa un encuentro constructivo cu e instituto reconoci; Nederlands Jeugdinstituut (NJi). Un instituto di conocemento cu ta maneha integralmente temanan relaciona cu hoben y nan bienestar. 

E reunion a enfoca riba e rol primordial cu Nederlands Jeugdinstituut ta hunga na Hulanda den formulacion di strategia y guia pa e desaroyo di hubentud riba tur nivel. Minister Croes, a tuma e oportunidad pa dialoga abiertamente riba experiencia, metodonan, y structura cu Nederlands Jeugdinstituut ta aplica pa duna apoyo efectivo na e maneho di mucha y hoben na Hulanda.

E intercambio a sirbi pa explora posibilidad concreto di colaboracion entre Aruba y Nederlands Jeugdinstituut.

“Nos mester traha riba un enfoke integral pa nos hubentud, unda e bienestar educativo, social y mental ta ser cuida di manera conecta y sostenibel”, Minister Croes a enfatisa.

E meta ta pa yega na solucionnan duradero y adapta na contexto Arubano, cu por fortalece e red di sosten pa nos hubentud. E reunion ta representa un paso importante den esfuersonan pa amplia e capacidad local, stimula innovacion, y crea base pa un colaboracion amplio entre otre den Reino pa un Aruba cu mas comprension, direccion y maneho debido integral pa nos generacion nobo.