ORANJESTAD, 17 di februari 2026 – Minister di Deporte, Gerlien Croes, a ricibi hunto cu Prome Minister, sr. Mike Eman, un bishita special di ex-pelotero profesional y Hall of Famer Andruw Jones.

Durante su bishita na Cocolishi, a combersa riba e experencia internacional di Jones y e manera cu e a logra forma un trayectoria cu a pone su nomber den historia di MLB. E encuentro a sirbi tambe como un momento pa delibera con Aruba por sigui inverti den deporte como un herment fuerte pa formacion di hoben talentoso.

Entre e tema principalnan cu a wordo trata tabata:

• E proyecto cu Jones ta conduci na Corsou, enfocando riba guia y desaroyo di talentonan hoben, pa duna nan structura, disciplina y direccion
• E posibilidad pa crea un iniciativa similar na Aruba, cu enfoke riba coaching, mentorship y formacion di atleta hubenil
• Oportunidadnan pa colaboracion cu superstarnan, pa fortalece motivacion y inspiracion den e comunidad deportivo
• E importancia di concientisacion pa hobennan pa nan logra combina deporte cu estudio, y pa mira educacion como un pilar esencial pa exito duradero

Minister Gerlien Croes a enfatisa cu e tipo di liderazgo, disciplina y experencia internacional cu Andruw Jones ta aporta, por ta di gran balor pa Aruba. Segun e Minister, e presencia di personahe nan cu un historia fuerte den deporte mundial ta contribui pa motiva y guia nos hubentud, specialmente den un tempo unda nos mester mas rolemodelnan positivo.

“E tipo di inspiracion cu Andruw Jones por trece, no ta solamente pa e atleta cu ta drenta cancha, pero tambe pa e hoben cu ta busca direccion. Nos mester sigui crea camindanan pa nos hobennan, pa nan por crece den deporte sin laga nan educacion atras,” Minister Gerlien Croes a expresa.

Minister Gerlien Croes a subraya cu e vision ta pa fortalece baseball na Aruba y na mesun momento usa deporte como un instrumento pa desaroyo personal y profesional. Pa Gobierno di Aruba, deporte no ta solamente competencia, pero tambe un forma di forma caracter, disciplina, responsabilidad y mentalidad pa futuro.

Ministerio di Deporte ta sigui traha riba iniciativanan cu ta pone hoben y desaroyo deportivo sobresali, y ta habri porta pa colaboracion cu partnernan local y regional pa Aruba por sigui eleva su nivel, y creando mas oportunidad pa talento Arubiano.