Oranjestad, 26 november 2025 – Ministerio di Educacion y Deporte di Aruba, bou di liderazgo di Minister Gerlien Croes, y e Consulado General di Merca na Corsou a firma un Memorandum Of Understanding (MoU)  pa restabelece un Comprehensive EducationUSA Advising Center na Aruba. Esaki ta un paso strategico cu ta amplia e posibilidad pa nos studiantenan pa obtene informacion gratis, exacto y acredita tocante estudio superior na Merca.

Den su palabra, Minister Croes a subraya e importancia nacional di e acuerdo,

“Nos ta inverti den futuro di nos yiu. Aruba mester un sistema cu ta habri portanan y trece mas oportunidad. cu  EducationUSA Center, nos ta eleva Aruba y ta duna nos studiantenan oportunidad real pa logra un educacion di nivel mundial.”

Un aliansa cu ta amplia e horizonte educativo pa Aruba

A traves di e acuerdo, e Ministerio di Educacion lo:

• Hiba e Centro EducationUSA na un espacio mas publico pa garantisa acceso amplio;
• Equipa e oficina di EducationUSA cu Advisers y coordinators full-time;
• Sigura cu tur studiante, scol, y famia por haya informacion actualisa y accesibel.

Na su banda, e Consulatado General Mericano y e Coordinador consehero Regional Educacional Mericano   (REAC) lo:

• Provee entrenamento oficial pa e asesornan di studiantenan;
• Suministra material educativo y recurso tecnico;
• Otorga apoyo programatico anual pa fortifica operacion di e centro;
• Sigura cu Aruba ta opera den conformidad cu e EducationUSA Global Standards y e “Principles of Good Practice”.
• E Centro lo sirbi como un hub di oportunidad y guia profesional

E Advisory Center lo:

• Duna orientacion individual y den grupo;
• Drenta  den scolnan y comunidad cu e informacion;
• Organisa workshop y presentacion educativo;
• Provee informacion actualisa tocante aplicacion, beca, visa di studiante  y universidadnan acredita na Merca. 

Minister Croes a enfatisa cu esaki ta un paso determinante den fortaleceguia y oportunidadnan den exterior pa nos hobenan 

“Educacion ta un pilar di transformacion. Pa keda relevante den un mundo cu ta cambia, nos studiantenan mester tin orientacion profesional cu ta basa riba realidad, necesidad y deseo y, no riba suerte. E Centro aki ta un inversion directo den futuro  di nos pais.”

Un compromiso cu futuro di Aruba

Cu e iniciativa aki, Minister Gerlien Croes ta re-afirma su rol como lider responsabel pa pone igualdad den oportunidad,y acceso na educacion di calidad central den su maneho.

“E futuro di Aruba ta den man di nos studiantenan. E responsabilidad di gobierno ta preparanan pa un mundo global. Awe nos a tuma un paso cu ta habri caminda pa generacionan di mañan.”