E falta di un sistema di transporte publico adecua ta un obstaculo pa nos grandinan cu limitacion di mobilidad. Mobilidad ta esencial pa mantene independencia y pa yuda nos pensionadonan sigui participa den comunidad y yega na servicio basico cu nan mester. P’esey, candidato Jeremy Erasmus ta compromete pa implementa un transformacion significativo den e sistema di transporte publico na Aruba.

Un sistema di transporte publico accesibel y pagabel cu cobertura amplio di ruta di bus. Un enfoke di Jeremy Erasmus ta pa logra cu transporte publico ta accesibel, specialmente pa adulto mayor, hoben bou 18 aña y studiante. Jeremy ta compromete pa crea oportunidad pa hobennan por bay haci deporte, actividad extracuricular y scol, eliminando limitacion di transporte.

Pa transporte publico ta realmente accesibel, Jeremy ta propone pa restructura e rutanan di bus pa cubri 80% di e isla cu parada cu ta 10 minuut leu na pia. Pa por logra mester crea un cooperacion entre Arubus y autobusnan pa yuda amplia y diversifica e rutanan na luganan strategico cu actualmente no tin transporte publico. “Nos no por forsa, ni incentiva persona pa haci mas uzo di transporte publico si esaki no ta accesibel. Esaki mester ta e prome paso”.

E plan di Jeremy tambe ta inclui modernisa e bushaltenan existente y crea nobo den colaboracion cu sector priva. Esaki ta sigura cu e puntonan di acceso ta sigur, comfortabel y adapta pa facilita e uzo di transporte publico hunto cu otro actividad recreacional, social y tambe pa actividad economico.

Jeremy ta enfatisa e importancia di siguridad social pa e trahadonan den transporte publico, proponiendo proteccion integral cu por inclui seguro di bida, seguro di salud, y mas importante ainda, un plan di pensioen pa nan por retira dignamente. Esaki no solamente ta beneficia e empresarionan priva, sino tambe ta yuda pa tin un servicio di transporte mas stabiel y sigur pa e comunidad.

Cu e propuestan aki, Jeremy Erasmus ta reafirma su compromiso pa construi un Aruba mas accesibel y inclusivo, caminda cada hende tin oportunidad pa participa activamente den su comunidad y mehora su calidad di bida.