Como e unico pilar di economia actual, turismo ta un fuente di entrada cu nos mester cuida. Saturacion den e industria aki ta crea un peso inmenso riba nos pais, en particular pa e necesidad di trahado cu esaki ta rekeri. 

Te asina leu cu FUTURO sa, tin tres proyecto grandi mas di hotel na caminda, na banda di locual ta den construccion caba, sin conta esunnan cu no ta conoci ainda. Pa transparencia na pueblo, nos partido ta boga pa publica tur permiso cu ta vigente y tur peticion cu ta den proceso. 

Ya caba Aruba no tin e cantidad di trahado necesario pa yena e cuponan di trabou existente, corda esunnan pa esunnan cu lo por bin ainda. Y no ta solamente e cantidad di trahado pa sirbi e hotelnan directo mester tuma na consideracion, pero tambe cupo di trabou pa otro negoshi cu lo lanta pa brinda servicio adicional na bishitante, manera e.o. tour operators y restaurant.

Pa e futuro cercano, turismo lo keda nos pilar economico, sinembargo tin indicacion cu mas y mas di nos hendenan ta prefera traha den otro sector pa nan por ta na cas cu nan famia anochi, den weekend y dianan di fiesta. 

Sinembargo, e modelo aki no ta sostenibel. Pa mantene industria di turismo na un nivel halto, mester garantisa e calidad di e bon servicio cu Arubianonan ta conoci p’e. P’esey FUTURO ta kere den empodera e capital humano y encurasha e crecemento entre nos propio hendenan. 

FUTURO lo kier establece curso pa local por desaroya nan capacidad y habilidad den e sector di servicio, yena e cuponan di trabou habri y reduci e necesidad di importa mas trahado di exterior. Fuera di esey, door di atrae mas ‘niche’ tourism, por ehempel cu enfasis riba cultura, arte y deporte, ta habri mas oportunidad pa nos hendenan den e ramo turistico. 

Pa proteha nos mercado laboral, FUTURO lo introduci u – un paro completo – riba mas hotel grandi, mas camber y mas condominium. E comerciante local mester por keda cu e oportunidad si pa projectonan manera “bed & breakfast” na cantidad di kamber limita. Mas construccion y mas hotel no ta sirbi nos interes mas, ni como pais, ni como ciudadano di e pais. E ta traha den nos desbentaha door di crea mas cupo di trabou cu no ta deseabel pa nos hendenan, forsando importacion di trahado, cu tur e consecuencia cu esaki por trece pa nos infrastructura, vivienda, fondonan social, enseñansa, trafico, etc.

Mayoria hotel ta gosa di un indice di ocupacion hopi halto; esaki pasobra Aruba ta un pais bendiciona, cu su beachnan blanco, su solo cayente y su hendenan cariñoso y servicial. Ta mas cu husto e ora pa e sector aki yuda na mitiga e.o. su impacto social. Futuro ta kere den introduci un Responsabilidad Social Corporativo pa hotelnan no solamente beneficia di nos pais, pero tambe yuda trece e balans bek den mercado laboral.