Den e ultimo añanan e sistema di educacion na Aruba a conoce poco progreso. Nos sistema di educacion hopi biaha no ta atractivo y na necesidad di cada studiante. Aunke cu a haci algun cambionan, toch esakinan no ta suficiente. Mester sigui inverti hopi mas den educacion pa asina cada studiante por tin un miho futuro.

Hopi scolnan tin un infrastructura bieu, materialnan pa duna les cu no ta moderno y integracion di tecnologia ta hopi limita. Nos scolnan mester wordo modernisa y nos sistema educacional mester ta personalisa. Scolnan mester ta ekipa cu hermentnan digital, materialnan y metodonan actualisa.

E curiculo cu ta brinda actualmente ta hopi academico. Nos enseñansa mester brinda mas espacio pa desaroya habilidadnan importante riba areanan relata na creatividad, desaroyo social-emocional, pensamento critico y siña resolve problemanan. Mester crea espacio den scolnan pa por practica mas ciencia, tecnologia, arte, deporte y mas.

Actualmente nos scolnan no ta ekipa cu tur e actornan necesario pa yuda brinda un enseñansa di cuido y di calidad na nos studiantenan. Nos scolnan mester tin trahadonan social, SMW’er(s) pa brinda ayudo mesora den problemanan social. Nos mester di assistentnan (onderwijs/klas) pa yuda e docente y e studiante. Nos mester di Begeleiders/Remedial Teachers/Prisma-

leerkrachten pa brinda studiantenan cu mester extra ayudo o guia cu diferente materia. Si cada scol por ta ekipa cu tur e actornan aki, nos enseñansa por bira mas inclusivo.

E brug cu tin na e momentonan aki entre educacion vocacional (beroepsonderwijs) y mercado laboral tampoco no ta bon alinea. E colaboracion cu mercado laboral ta di importancia pa yuda diseña programanan cu lo yuda cumpli cu e demanda cu pais Aruba mester.

Añadi den e curiculo formal materianan y habilidadnan relata na entrepreneurship y ‘digitale geletterdheid’ sigur lo trece un cambio necesario cerca nos alumno y studiantenan pa asina hisa nan habilidad di por competi riba mercado laboral.

Maestronan ta yega nan blafon salarial cu nan 38 aña y mester sigui traha pa por lo menos 28 aña mas cu e mesun salario. Cu e expectativa cu nan ta sigui eherce nan vocacion mientras cu nan desaroyo personal y socio economico ta stagna. Costo di bida ta sigui subi e trabou pa e maestronan ta bira cada biaha mas hopi y pisa y tur esakinan ta trece demotivacion pa e maestro.

Futuro kier trece cambio den compensacion di maestronan. Mester sigui inverti den profesionalisacion di nos maestronan pa nan por keda cualifica y motiva. Si nos atende cu e desafionan den nos sistema di educacion y keda evalua esakinan continuamente nos ta haci e fundeshi di nos pais Aruba mas solido. Nos por crea un sistema di educacion efectivo, adaptabel y inspirativo pa cada studiante.

Un colaboracion entre gobierno, educadornan, mayornan y comunidad lo por garantisa cu tur studiante por logra y contribui na desaroyo di Aruba. Educacion ta e motor di un pais! Educacion ta defini e futuro di nos isla.