San Nicolas, e palabranan cu ta den boca di tur partido politico durante tur campaña y semper cu yen di promesa; algo cu a bira un custumber pa nos na San Nicolas. Pero cuanto di nan en berdad tin San Nicolas na curason. 

E mayoria cu ta papia di San Nicolas no ta di San Nicolas, ni biba na San Nicolas y nan no ta experiencia e retonan di San Nicolas diariamente. Nan no ta experiencia con largo e ta dura den bus pa yega trabou of cuanto placa bo mester paga na gasolin pasobra mayoria di trabou ta na e otro banda di e isla.

Nan no ta experiencia cu bo no por cumpra cierto cos na San Nicolas pasobra no tin un luga cu ta bende. Nan no ta wak con bashi e negoshinan ta y nan no ta wak e problemanan social di tur dia.

Wak con San Nicolas ta aworaki. San Nicolas ta neglisha pa e ultimo dos decadanan di tur gobierno cu a sinta. Tin cu a haci net nada pa e districto y tin cu a haci un tiki pa parce cu nan a haci algo. Pero e situacion na San Nicolas mes ta e prueba cu nunca a sinta pa bin cu un plan serio pa desaroya San Nicolas economicamente, ni socialmente. 

Den e ultimo añanan San Nicolas a perde mas cu 4000 di su clase trahado door cu nan a muda of haya tereno den otro districto. Tin biaha bo por hasta pensa si esey tabata strategicamente haci door cu mayoria tereno otorga den e ultimo añanan tabata den otro districto y no na San Nicolas. Loke San Nicolas si a haya ta proyecto pa cas di pueblo, prizon y esey a pasa bou di tur gobierno den e ultimo 3 decadanan.

Un Plan pa San Nicolas: Team Futuro

Team Futuro ta compronde e desafio y ta pone San Nicolas como un prioridad, cu 27 punto riba nos programa pa desaroyo. Nos plan ta enfoca tanto riba solucion inmediato, como solucion pa largo plaso.

Solucionnan Na Corto Plaso:

• DIP mester pone prioridad riba duna tereno di erfpacht den e area di San Nicolas.
• Trece departamento di gobierno bek na e centro di San Nicolas. Imagina bo cu tin 150 ambtenaar trahando den centro di San Nicolas. Esey lo crea un fluho di hende pa e centro, asina aportando na e economia di San Nicolas

Solucion Na Largo Plaso:

• Kibra parti di e muraya di e refineria y habri e area pa desaroyo di vivienda, negoshi y parke.

Otro Puntonan Importante:

• Desaroya San Nicolas como un centro di arte, cultura y historia.
• Trece programa despues di scol pa motiva nos hobennan.
• Introduci un centro di actividad pa adulto mayor.
• Renoba edificio bashi pa uza como vivienda of espacio pa arte y cultura.
• Ofrece incentivo fiscal pa atrae inversion pa renoba edificio comercial y pa promove desaroyo economico.
• Facilita fondo entre gobierno y sector bancario pa financia e renobacion di edificio y business loans na un interes reduci.
• Explora colaboracion cu Surinam y Guyana pa uzo di e tankinan di refineria pa deposito di petroleo.
• Uza parti di tereno cu no ta contamina pa crea un parke di solar panel, y esaki lo contribui pa reduci gasto di electricidad.
• Construccion di un Farmer’s Market y introduccion di un sistema di maneho di precario pa facilita actividad comercial den centro di San Nicolas.
• Mantene y renoba facilidadnan deportivo y barionan.
• Un stage permanente den Carnival Village pa evento cultural y concierto.

  Pa wak tur e puntonan y full e plan di partido bay nan www.futuroaruba.com

Dicon Vota pa Team Futuro?

San Nicolas ta conta pa alrededor di 3 asiento den parlamento. E votado di San Nicolas mester ta consciente di kico e ta haci. Tin partido politico cu sa caba cu nan no ta bay inverti mucho den San Nicolas, pero ta bezig ta propaganda nan mes pisa den San Nicolas. 

Bo no mester ta un rocket scientist pa sa ken nan ta, pasobra nan a yega di haci mescos caba. Ta p’esey San Nicolas no mester cay pa e cosnan aki atrobe. Mester laga nan sa “e biaha ki no!” 

Como un habitante di San Nicolas cu semper a biba na e districto, ami, Rondel Heyliger (#8 riba lista di Team Futuro), ta compromete pa traha fuerte pa mehora e situacion social y economico di mi districto. Si bo duna mi bo confiansa, lo mi lucha pa un futuro miho pa nos pueblo den parlamento of gobierno.

Dia 6 di december, vota pa Team Futuro y pa un hende cu lo defende San Nicolas. Vota Rondel Heyliger! Y si a caso bo ta un campañado of sostenedo di un otro partido y bo no por vota pa mi, por fabor vota pa bo candidato di San Nicolas riba e lista di bo partido. Hunto nos por trece e cambio cu nos districto mester!