Despues di a haci su entrada formal den e escena politico local, partido FUTURO ta consciente cu e reto su dilanti ta di demostra kico exactamente ta loke ta diferencia nan di otro organisacionnan y pakico e ta representa e miho alternativa di liderazgo den e proximo eleccion. 

Sra. mr. Gerlien Croes a splica cu e ideologia di FUTURO ta resumi den e forsa progresivo di cada individuo cu ta guia su mes pa transparencia, responsabilidad, integridad, libertad y confiansa. A base di esey ta formula un gobernacion efectivo y eficiente cu inclusion y integridad, pa crea e miho condicionnan economico y social pa e comunidad Arubano.

Esaki ta e pensamento cu cual ta busca pa pasa e pagina di e ultimo tres decada caminda a bay tras di crecemento economico sin limite, mientras cu e indicadornan social a keda hopi atras. Cada signatura a  goberna di manera egoista y sin vision riba termino largo. A keda pusha e problemanan bou tapijt pa otro purba soluciona y esey ta un di e motibonan principal pakico awendia ta reina un desconfiansa den gobernacion.

FUTURO ta pone un stop na e campaña basa riba promesa falso y solucion rapido. Ta consciente cu finanzas publico te na vivienda y for di embehecemento te na necesidad structural di forsa laboral, ademas di pobresa y hopi problema social ta algo cu no por bin di awe pa mañan, pero un cambio den e liderazgo nacional awo, ta imperativo y urgente pa por restitui e ordo y resolve e problemanan structural profundo.

Gerlien Croes: “Nos mester formula e plan ey colectivamente,  biniendo hunto, protehando esun mas vulnerabel y percurando pa construi  un futuro sostenibel pa e generacionnan venidero; pa cada un di nos por disfruta di un bida digno na Aruba manera nos tur merece.” 

“Cu un compas moral y pureza di accion ta esencial pa alcansa un comunidad fuerte cu por trece solucion y pensamentonan sostenibel pa medio di innovacion social, desaroyo personal. Husticia social mester ta garantisa den decisionnan transparente y responsabel” 

Y esey ta loke FUTURO ta ofrece na e ciudadanonan di Aruba: un direccion diferente pa nos por conoce un FUTURO miho. Pa mas detaye, bishita www.futuro.aw